Четврток, 13.11.2008
Египетските археолози, покрај славната скалеста пирамида, на 20 метри под песокот ископаа постамент на досега непозната пирамида за која се верува дека била висока 15 метри.
Пирамидата стара 4.300 години ја претстави египетскиот министер за култура Фарук Хосни, кој прес-конференцијата ја одржа на Скалестата пирамида на кралот Џозер, првиот објект од ваков тип кој некогаш бил изграден во Египет.
Шефот на египетскиот совет за старини Захи Хавас верува дека новопронајдената пирамида е најверојатно изградена во чест (и како вечно почивалиште) на кралицата Сешешет, единствената пирамида која "фалела" во овој регион. Неговата екипа го истражувала местото 2 години, а пирамидата е откриена пред два месеци, кога се утврдило дека градбата која е ископана од песокот е всушност - изгубената пирамида, вкупно 118-та досега пронајдена во Египет.
Археолозите се подготвуваат да влезат во пирамидата за две недели, иако веруваат дека и овој храм кој досега се криел на 20 метри под површината на песокот - е ограбен.
